بسم الله الرحمن الرحيم
اهلا مُجدداً يا أصدقاء 🖤😌🌻
اليوم حابة اتكلم عن روتين عنايتي بالبشرة، دايماً متجدد ومتغير حسب الجو وحسب احتياجات بشرتي كل فترة وفترة. احب اجرب منتجات جديدة كل فترة بمكونات اعرف انو بشتري تستجيب لها، واحب اضيف مكونات جديدة كمان على حسب احتياج بشرتي.
طبعا كل بشرة والثانيه تختلف، مو شرط نوعها وطريقة العناية لكل نوع بس كمان استجابة كل بشرة والثانيه وتفاعلها مع المكونات او عدم استجابتها نهائياً.
انا بشرتي مُختلطة/دُهنية ومعرضة للحبوب. تتغير حسب الجو او المنتجات اللي أستخدمها والحبوب اللي تطلع بين فترة والثانيه غالباً تكون هرمونية. طريقة تعاملي معاها يختلف من فترة للثانيه وغالبا حسب شكلها وسرعة استجابتها ومزاجي لعلاجها. ماتشكل مشكلة بالنسبالي ابدا، ما احس اني اعاني منها لانها شي لايكاد يذكر وتختفي وتطلع جديدة وهكذا وغير ملحوظة ابدا. ف يعني روتين عنايتي مايستهدف علاجها بس بعض المنتجات تساعد في العلاج.
اول شي راح اذكره هوا نظافة البشرة، المنتجات اللي استخدمها لتنظيف بشرتي سواء بالمكياج او من دون مكياج.
استخدم ٣ منتجات اساسية لنظافة بشرتي:
لأزالة المكياج استخدم cleansing balm 🌸💜
استخدم هذا المنتج من كلينيك، اسمه
Clinique take the day off cleansing balm.
هوا عبارة عن غسول مرطب شكله زي مرطبات الشفايف و لمن تاخذي منه بيدك يبدا يسيح ويتحول لزيت. انا اخذ منه شويا باصباعي واحاول اخليه يسيح شويا بفرك بسيط بين اصابيعي بعدين احطو على وجهي بداية بالبشرة والروج واخر شي العين. مره ممتاز لأزالة المكياج سواء ثقيل او خفيف، ضد المويا او عادي ولطيف على البشرة مايحسسها ولا يجردها من الزيوت الطبيعيه ولا يسد المسامات. اول ماتحطي عليه مويا يقلب زي الغسول الخفيف ويخرج بسرعه. بالنسبه للعيون انا الاحظ انو لمن استخدمه على عيني يضايقني شويا لانو احسه يدخلها بس احرص دايما اغسلها مزبوط وبعد كذا يسير عادي اهم شي كل المكياج اللي اكون حاطته يخرج بسلام من غير ماحس انو بشرتي اتقطعت من كثر المنتجات او نوعيتها.
بعد ما أضمن انو كل المكياج خرج من وجهي ورقبتي واطراف شعري واذني (ممكن بالغلط يوصل الاذن لازم تتأكدي من نظافتها حتى لو ماحطيتي عليها متعمدة) ابدا اشطفه بالمويا، على طول يخرج من غير مايسبب مشكلة او جفاف مره ممتاز لأزالة المكياج ومره لطيف على البشرة وبعد ما اشطفه مايكون فيه نقطة مكياج.
الخطوة الثانيه بعد ما انظف المكياج من بشرتي استخدم غسول وجهاز التنظيف من foreo
هذا الخطوة كل يوم اعملها سواء حاطة مكياج او لا نظافة البشرة من الترسبات والدهون وبقايا الكريمات ووساخة الجو اساسية. كل بشرة والثانيه تختلف انا اشوف بشرتي تستجيب افضل مع التنظيف كل يوم بهذا الجهاز.
لمن احط مكياج لازم اغسل بشرتي بالغسول مرتين بعد ال cleansing balm. احب احرص انو كل نقطة مكياج خرجت من وجهي. مره ضروري لانو لمن التنظيف مايكون صحيح على طول تطلعلي حبة اليوم الثاني.
🌸🍃
بعد تنظيف البشرة ابدا استخدم الكريمات ✨
انا ماحب اجمع مليون خطوة في وجهي ف اقسم الخطوات خلال اليوم شي ف الصباح شي قبل النوم وشي اذا حسيت مع الوضوء والغسيل انو بشرتي تحتاج ترطيب او اذا حطيت ماسك احط بعده مرطب.
فيه حالتين عندي للكريمات، اذا غسلت بشرتي نص اليوم وماراح انام استخدم تونر وزيت للبشرة او مرطب عادي واذا وقت نوم استخدم كريماتي الثقيله زي الريتنول والAHA, BHA هذا النوع من الكريمات ماحب استخدمه في اي وقت غير قبل النوم.
نبدا بالتنورز 💕🍋
استخدمها اول خطوه قبل الكريم والزيت او قبل واحد منهم لو اكتفيت بواحد.
اول تونر من فريش
BLACK TEA AGE-DELAY INSTANT INFUSION From fresh.
هذا تونر معالج ومرطب للبشره من فريش. احب استخدمه لانو الاحظ فعلا انه يرطب البشرة وينعمها الاحظ الفرق فكل مره استعمله. من مكوناته الاساسيه الشاي الاسود والبلاك بيري وكمان اليوسفي الياباني والهيالورونيك. كمان يحتوي على فيتامين E وC.
كل هذي المكونات تساعد في ترطيب وتوحيد لون البشرة وحمايتها. منتج مره جميييل 🖤
التونر الثاني من كيلز Cucumber Herbal Alcohol-Free Toner 🥒🌱
هذا التونر يساعد في توازن وتصفية البشرة. من مكوناته الاساسيه الخيار وطبعا خالي من الكحول. ينفع للبشرة الجافه والبشرة الحساسة.
او استخدم زيوت herbivore botanicals اضافة جديدة لمنتجاتي. اخلطها سوا واحطها على وجهي مع كريم للعين من اي ماركة موجوده، حاليا عندي عينات كثيرة ف استخدمها في هذا الوقت.
💕🍃
قبل النوم عندي روتينين للبشرة، يوم استخدم AHA ويوم استخدم ريتنول.
الروتين الاول 🍃
المنتج الاول اللي راح اتكلم عنه هوا Good genes من Sunday Riley
هذا المنتج عشق، مره احبه لانه فيه حمض اللاكتيك "الحليب" ف يعتبر من منتجات الAHA. هذا المنتج يساعد في تقشير البشرة وتفتيحها وعلاج اثار الحبوب والتصبغات من الشمس او التقدم في العمر. يساعد في تنظيف المسام. يساعد على علاج الخطوط الرفيعه في البشرة بشكل ملحوظ زي خطوط الابتسامه او خطوط الجبهه. يناسب كل انواع البشرة حتى البشرة الحساسه.
اخذته مرتين ومازلت حشتريه للمره الثالثه لانه من اساسيات عنياتي ببشرتي ❤️
وقفته في فترة من الفترات لانه خلص وماطلبت جديد وطلعتلي حبوب زي ماذكرت قبل، تطلع وتروح بس هذي المرة كانت الاثار مزعجه وطولت معايا لمن وصل المنتج واستخدمته في اسبوعين اختفت الاثار مره كونت فرحااانه لانه ازعجتني كانت صامدة ويبغالها شي قوي زي الAHA والحمدلله اتخلصت منها 💪🏼🍃
طلبته اونلاين من نوردسترم تقريبا في حدود ٥٠٠ ريال او اقل الحجم الصغير ويكفيني طول السنه 💪🏼✨🍃
الكريم المرطب اللي استخدمه مع قود جينز هوا جل جينزينق من اورجينز يناسب البشرة الدهنيه ومافيه شي واو يعني ماتوقع ارجع اشتريه. ترطيبه حلو بس مو مره واو عندي غيره افضل. سعره كمان معقول حدود ١٥٠.
🍊🍃
كريم العين استخدم الافوكادو من كيلز مره احبه واحسه ناسبني مره من ناحية الترطيب، مالاحظت فرق في الخطوط مدري يمكن مع الوقت بس عموما احبه واحس ترطيبه يرضي احتياجاتي 😌🥑
الروتين الثاني 🍃
اذا استخدمت في الليلة السابقه قود جينز يكون موعدي الليله هذي مع الريتنول.
انا استخدم هذا الريتنول من peter thomas roth 🌸💜
الريتنول شي اساسيييي اضفته هذي السنه لعنايتي وماراح يخرج منها للابد ان شاءالله. اذا حابة بشرة نظرة وشابة ومليئه بالحب عليكي بالريتنول يا اختاه 😌💪🏼
اول شي حابة اكتب معلومات بسيطة عنه بالاضافة لتجربتي معاه✨
الريتنول هوا عبارة عن فيتامين A بأختصار شديد ✋🏼
يساعد في زيادة انتاج الكولاجين في البشرة ويحارب التجاعيييد بشكل عجيب كتبت يحارب لانه متأكدة انو شاد حيله عليها. مره مره عجيييب يابنات ماعمري عانيت من تجاعيد او خطوط رفيعه ابدا وبالرغم من هذا مازلت لاحظت فرق عجيب في شكل بشرتي الحمدلله
لمن احط مكياج كان الفاونديشن لازم يخطط لمن ابتسم بس ماكانت تشكلي مشكلة لانها بسيطة جدا بس ماعاد سرت اعرف ذي الخطوط بعد ماتعرفت على السحر الجميل الحمدلله عليه صديقي المفضل الريتنول 🍃
كمان من الاشياء اللي يسويها انو يعالج الحبوب واثارها، دايما نسمع بمنتجات الروكاتين للبشرة اللي تعالج الحبوب وكذا والروكاتين هوا نسبة معينه من فيتامين A احيانا تكون عاليه لمن يكتبو عليها تحذيرات معينه زي "ممنوع الحمل يسبب تشوهات للجنين"
طبعا واضح ذحين انو الحامل والمرضع ماتستخدمه 🌚✋🏼 الله يعينك توقفيه الين تخلصي 😌💔
انا بدأت من اقل نسبة بالنسبه ليا للرتنول لانه قيد استخدمت روكاتين قبل ف عارفة انو بشرتي تستجيب له وماخوفت منه وراح ارجع اطلب منتج ثاني نسبه اعلى. يمديكي تبدأي تستخدميه من اقل نسبه الين بشرتك تتعود وتبدأي تزيدي النسبه مع الوقت اعلى نسبة موجود في السوق للشراء من غير استشارة طبيب اعتقد انها ٦٪ وهيا اللي راح اطلبها المره الجايه ان شاءالله من الماركة المفضله Sunday Riley 😻✨
اول ماتبدأي تستخدميه راح تلاحظي جفاف في بشرتك وقشور الين البشرة تبدأ تتعود عليه. بعدين ماتلاحظي شي غير السنع والزين اللي يسويه في وجهك < واضح العشق 😂💔
طيب بعد هذي المميزات لازم اذكر التحذيرات 🌚✋🏼
✨اول شي الحامل والمرضع لا تستخدميه معليش اصبري
✨ماتستخدميه مع اي منتج بالذات اي منتج يحتوي على AHA او BHA
✨ابحثي عن افضل المنتجات للي تسخدميها معاه لازم تبحثي عن كل معلومه لانه اضافته لروتينك سهل بس لازم يكون صحيح عشان بشرتك لاتتأثر اذا اتفاعلت المكونات لاسمح الله او اقل شي ممكن تبطل مفعولها كلها وماتستفيدي شي
انا استخدم معاه منتج فيه
Hyaluronic acid الهايلورنك اسيد ممتاز مره مع الريتنول لانه يرطب البشرة بشكل ممتاز ويحفظ ترطيبها بالذات مع منتج زي الريتنول ممكن يسببلك جفاف.
ممكن تستخدمي معاه كريم فيه فيتامين سي بس بحذر لانه ممكن المنتجات ماتتناسب سوا بس فيتامين سي والرتنول يعالجو نفس المشاكل وهدفهم واحد وسحررر سوا اذا عرفتي تختاري المنتجات بشكل صحيح بس لاتجازفي اذا ماتعرفي ايش يناسب مع ايش الافضل تبحثي عن شي امن لبشرتك او تستخدمي شي ف الصباح وشي في المساء ❤️
الكريم المرطب اللي استخدمه مع الريتنول من Sunday Riley
هوا عبارة عن جل وفيه حمض الهالريونيك مره ممتاز احبه وكل ماستخدمه واصحى الصباح اشوف بشرتي نقيه وجميله وناعمه وترطيبه كمان ممتاز من الكريمات اللي راح ارجع اشتريها لانه قرب يخلص وريحته كمان حلوة زي الخيار تقريبا.
كريم العين في الليل استخدم الافوكادو من كيلز 🍃🥑
طريقتي زي ماهي واضحه يوم استخدم ريتنول واليوم الثاني قود جينز ماخلطهم سوا واحب استخدمهم في الليل عشان تجلس على بشرتي اطول فترة ممكن والريتنول احبه في الليل بالذات لانه يساعد على تجديد البشرة وعلاجها ومحاربة التجاعيد ووقت النوم البشرة تجدد نفسها بشكل طبيعي ف الريتنول يساعد انو توصل للنتيجه المطلوبه بشكل اسرع.
كل منتج ذكرته يحتاج وقت عشان يبان على بشرتك تحتاجي تقريبا ١٢ اسبوع واكثر عشان يبان الفرق اذا لاحظتي الفرق قبل زي وضعي مع بعض المنتجات ف هذا شي ممتاز بس لاتستعجلي على النتيجه وتستني في يوم وليلة تشوفي سحر ف بشرتك.
بعض المنتجات المذكوره قويه على البشرة لازم تتأكدي انك ماتتحسي وتعرفي اللي يناسبك اول اشجع على البحث المكثف لانه بشرتك غالية وعلاجها و الحفاظ عليها لازم يكون بعد بحث طويل وقرار صائب لكل منتج تحطيه عليها.
اخيرا واقي الشمس 🌤
لازم لازم لازم تستخدمي واقي شمس يحتوي على هذي الكلمتين المهمه UVA/UVB لحمايتك من اشعة الشمس اللي تسبب حرق للبشرة او تجاعيد.
اذا ماتستخدمي واقي ابعدي عن الريتنول وعن اي منتج يحتوي على AHA/BHA او فيتامين سي لانه كذا انتي تدمري بشرتك ماتعالجيها.
انا استخدم هذا الواقي من كيلز فيه لون بسيط كأنه فاونديشن، حمايته ممتازة ومايحسس بشرتي ومايطلعلي حبوب. مافكر ارجع اشتريه لانه فيه لون زي الفاونديشن افضل اللي زي الكريم ماله لون ف راح اجرب ماركة ثانيه غيره بعد مايخلص.
اذكرورلي اهم شي في عنايتكم بالبشرة وايش افضل المنتجات اللي غيرت كثير ف بشرتكم واهم المكونات اللي تجذبكم لشراء المنتج 😻✨
وبس دمتم بحب وجمال وسعادة 😌🍃❤️
0 comments:
Post a Comment