بسم الله الرحمن الرحيم
🍃🌸🌻🌱
اهلا مجدداً يا أصدقاء 👀🍃
رجعت لكم اخيرا بموضوع جديد وعدتكم فيه سابقاً وهو عن استخدامي للزيوت المركزة
موضوع سهل وبسيط وان شاءالله يحققلكم الفائدة المرجوه منه ☺️🙏🏼🌸
١-للشعر
استخدامي للزيوت المركزة مره بسيط لشعري
باختصار استخدمه ب٣ طرق
١- اسوي ماسك مركز لشعري باستخدام ماسك موجود عندي واضيف عليه نقطتين من اي زيت مركز حابته او اسوي بنفسي الماسك باستخدام منتجات عندي زي مثلا زبدة الشيا واضيف عليها زيت جوز الهند وزيت الخروع وكم نقطة من زيتين مركزة او اكثر.
طريقتي// اول شي اذوب زبدة الشيا في المكرويف واضيف زيت جوز الهند معاها الين يذوبو سوا اضيف عليهم زيت الخروع واخلطهم مع نقطتين او اكثر من زيت شجرة الشاي، الروز ماري واللافندر.
اول شي ريحته مره جميله وترطيبه ممتاز للشعر الجاف، وثاني شي فوائدهم للشعر مره كثيرة راح اذكر كل زيت وفائدته للشعر.
٢- الطريقة الثانيه// ممكن اكتفي بس بزيت جوز الهند واضيف عليه اي زيت مركز، غالبا احب زيت الروزماري وزيت شجرة الشاي لشعري. هذي الطريقة ممتازة لمن اكون مستعجله ومو مخططه اني اخلي الزيت اكثر من ٣٠ دقيقه على شعري.
٣- الطريقة الثالثه// ممكن اضيفهم للسيرم نقطة وحدة تكفي احطها في يدي مع السيرم واخلطها واحطها على شعري، الريحه حلوة وفي نفس الوقت مره مفيد للشعر🍃🌻
🍃زيت الروزماري
هذا الزيت فعّال في زيادة كثافة الشعر ونموه وكمان مضاد للأكسدة.
🍃زيت اليوكلبتس
هذا الزيت ريحته زي الڤكس، من فوائده يحفز من بصيلات الشعر ويساعد في صحة الشعر ونموه. بالاضافه لتهدئة الحكه في فروة الرأس ويعالج مشاكل القمل. مره ممتاز للاطفال اللي يعانو من هذي المشكلة في المدرسة على الاقل طريقة طبيعيه وماتضرهم ان شاءالله 🍃💪🏼
🍃زيت شجرة الشاي
فوائد زيت شجرة الشاي للشعر مره كثيرة، من اهمها انه زيت قوي وفعّال للتنظيف ومضاد للجراثيم. لمن يستخدم للشعر يساعد في تنظيف بصيلات الشعر ويساعد في نموه.
🍃زيت السيدرا
هذا الزيت الاقل استخدام عندي، ماحب ريحته بس هذا السبب 😂. لكنه ممتاز جدا في تخفيف تساقط الشعر وزيادة نموه. من الزيوت اللي تساعد في موازنة الزيوت الطبيعيه في فروة الرأس وكمان مضاد للبكتريا والفطريات اللي تسبب تساقط الشعر والقشرة.
🍃زيت اللافندر
هذا الزيت مره ممتاز لتهدئة فروة الرأس، بشكل عام يساعد في نمو الشعر ويهديء من التوتر بالاضافة انه مضاد للجراثيم وهذا الشي يحسن من صحة فروة الرأس
🍃زيت النعناع
زيت النعناع مره قوي، لمن تحطيه تحسي بيه على فروة الرأس لانه يسبب برودة وتنميل خفيف وهذا الشي يساعد في زيادة الدورة الدموية في المكان اللي تحطيه عليه، هذا الشي يساعد في زيادة نمو الشعر وصحته. دوبي انتبه انو ماله صوره 👀🍃
💡هذه الزيوت المركزة كلها لازم لازم تستخدم مع زيت اخر يخفف من حدتها. زي مثلا جوز الهند، زيت الافوكادو، زيت الزيتون وغيرها.
٢-للبشرة
🍃زيت شجرة الشاي
زي ماذكرت سابقاً، هذا الزيت ممتاز لانه قوي وفعّال للتنظيف ومحاربة البكتريا ومضاد للجراثيم. للبشره، احب استخدمه على الحبوب اي حبة تطلع احطه عليها باعواد الاذن او باصباعي بس لازم قبل ماحطه ع البشرة اخففه بمويا زي مثلا ابلل قطنة عود الاذن وامسح بيها ع الزيت احطه بعدين على البشرة. ممتاز مره واحب استخدمه دايمااا لأي حبه تطلعلي 💪🏼🍃
🍃زيت البرتقال 🍊
زيت البرتقال ريحته تجيب السعاده مره احبها. احب اخلطه مع اي ماسك طبيعي احطه لوجهي. مثلا ماسك الزبادي والطحينه احط معاهم كم قطرة من زيت البرتقال واستخدمه على البشره مره احبه 🧡
من فوائده للبشره، انه يساعد في تصفيتها وتألقها ونعومتها احب اضيفه لهذا الماسك بالذات لانو زيت البرتقال حار شويا ع البشرة ف مع الماسك يخفف من حدته كثير.
🍃زيت اللافندر
هذا الزيت مهديء للبشرة مره، اي وقت الاحظ بشرتي تعبانه وتحتاج حب احط كم قطرة منو مع اي ماسك واستخدمه ع البشرة. غالبا احب اضيفه مع ماسك الطين. من فوائده يحارب حب الشباب، يساعد في تهدئة الايكزيما ومشاكل جفاف البشرة، يساعد في معالجة الاجراح في البشرة ويحارب التجاعيد.
٣-للجسم
احب استخدم لجسمي ٣ زيوت بالعادة اخلطها سوا. احط ٣ قطرات من كل زيت. او ممكن استخدم واحد منها على حسب احتياجي وقتها. هذي الزيوت اللي استخدمها هيا زيت اللافندر وزيت البرتقال وزيت شجرة الشاي
طريقة استخدامي لها:
اسوي كريم لجسمي ثقيل يتكون من:
💛زبدة الشيا
💛زيت vegetable glycerin
💛جل الصبار
💛زيت الهوهوبا
💛زيت بذور العنب
اخذ كم ملعقه من الزبدة واذوبها في الميكرويف واضيف معاها زيت vegetable glycerin، جل الصبار وزيت الهوهوبا وبذور العنب. ملعقتين من كل زيت وكم ملعقه من جل الصبار. اخلطهم سوا الين يسير الخليط ثقيل ومتجانس واضيف كم قطرة من كل زيت واحطهم في علبة قزاز واستخدمه على اماكن زي الركب والاكواع والقدم. احبه مره ترطيبه ممتاز ولاحظت فرق كبير في بشرتي بالذات في الاماكن الجافه ❤️💪🏼
🍃🍃🍃
🍃استخدامات اخرى لصحة افضل🍃
انا بحثت عن استخدامات الزيوت المركزة للصحه بحث سريع وقتها كنت تعبانه وافتكرت انه لها فوائد للمشاكل اللي عانيت منها وطلع فعلا موجود استخدمات كثيره لها. بشارك تجربتي وطريقتي لكن لازم تبحثي قبل ماتجربي اي شي وتتأكدي اذا يناسبك او لا ❤️
🍃للزكام والكحه: استخدمت زيت النعناع للزكمه والكحه كنت احط منه شويا مع زيت ثاني زي زيت الهوهوبا مثلا على صدري قبل النوم وطول اليوم. مره لاحظت بتحسن صح ماعالج المشكلة بس خفف من حدتها. وللزكام صراحه استخدامي غلط له لانه استخدمته لوحده من غير ماخففه بزيت ثاني بس اخذت مسحه بسيطة منه وحطيتها على عظمة الخشم حسيت براحه بعدها ممكن كمان الشم يكفي.
🍃لانقباضات الدورة: استخدمت زيت اليوكلبتس لالام الدورة، كنت ادهن منه كميه بسيطة على بطني وظهري مره كان يخفف من حدة الالم ومهديء ممتاز صراحه
🍃زيت اللافندر معروف انه ممتاز للتوتر وللمساعده على النوم بشكل افضل. استخدمته مره او مرتين لهذي المشكلة، ماقدر اقول اني لاحظت فرق لاني مالتزمت عليه 😅🌸
وبس بكذا لخصت تجربتي لهذه الزيوت ان شاءالله تكونو استفدتو واضفت لكم معلومه جديدة
شاركوني زيوتكم المفضله وطريقة استخدامكم لها واراءكم وتجاربكم 👀💕
شكرا لكم 🌸🙏🏼🍃
تحمست اجرب زيت الروز ماري 😍😍
ReplyDeleteجميل جدا .. 😍😍😍
ReplyDelete