السلام عليكم جميلاتي 💕
التدوينه الثانيه من تحدي النافذة 💪🏼
في هذي التدونيه مارح اتكلم عن الاشياء السعيده الكبيرة بس حاتكلم عن الاشياء البسيطة اليوميه اللي تسعدني لانو هذي أهم عندي من اللي تحصل مره في السنه لانها تأثر على نفسيتي بشكل يومي 😌🖤☕️
اول شي حابه اشارككم بعض من أفكاري حول موضوع السعاده. في الفتره الاخيره ملاحظه انو مفهوم السعاده اتغير من شعور داخلي الى هوس لامتلاك الاشياء بحجة انها تسعدنا!
صحيح انو امتلاك الاشياء فيه نوع من السعاده لكن مو هو الاساس طبعا، اذا حصرنا مفهومنا للسعاده انها فقط اشياء ماديه نمتلكها لو اشترينا الدنيا بما فيها مارح تسعدنا. بعض الحسابات المشهوره ممكن عززت من هذا الفكر عند بعض الناس ممكن الاغلبيه مراهقين بس للاسف فيه كبار “مؤمنين” انو السعاده بامتلاك بيت كبير وافخم الماركات من شنط وعطور والى اخره وتلاحظو انو مهما امتلكوا من هذي الاشياء الماديه سعادتهم مؤقته فقط واول ماتخلص تلاقيهم يدوروا على شي جديد يشتروه عشان يعطيهم هذي السعاده المؤقته، دخلوا نفسهم في دوامه كئيبه ونظرة محدوده جدا للحياة! للاسف واجهت ناس كثير في حياتي هذا مفهوم السعاده عندهم محصور بالماديات. 💔
😅
😅
السعاده شعور داخلي، اذا قررتي انك تعيشيه وتستشعريه راح تكوني سعيده برغم كل المعوقات. القرب من الله، الثقه به والتفاؤل يعزز من هذا الشعور عندك. مهما مرت علينا ايام صعبه ونعيش فيها الحزن بكل مراحله الا انه ثقتنا وقربنا من الله راح يعوضنا وينسينا ويسعدنا باشياء كثيره مختلفه عن اي شي خسرناه.
اذا قررتي كل يوم انك تستمعي بيومك وحياتك ونظرتي نظرة جميله ومتفائله للحياه راح تعيشي يومك سعيدة. انا من الناس اللي اشوف انه التفاؤل والنظرة الايجابيه للحياه والثقه بالله اسلوب حياة المفروض ندرسه ونتعلمه ونعزز منه، ايماني انو ربي راح يعطيني على قد ثقتي وظني بيه هوا اللي يحدد نظرتي ليومي اذا حابه اعيش منكده وكئيبه او متفائله ومحسنه الظن بالله وسعيدة. 🙏🏼💚
هذا الحديث عن الظن بالله من اكثر الاحاديث المقربه لقلبي وكل ما حسيت بالاحباط واليأس ذكرت نفسي بيه.
عن أبي هريرة - رضي الله عنه - قال : قال النبي - صلى الله عليه وسلم - : يقول الله تعالى : ( أنا عند ظن عبدي بي ، وأنا معه إذا ذكرني ، فإن ذكرني في نفسه ذكرته في نفسي ، وإن ذكرني في ملإ ذكرته في ملإ خير منهم ، وإن تقرب إلي بشبر تقربت إليه ذراعا ، وإن تقرب إلي ذراعا تقربت إليه باعا ، وإن أتاني يمشي أتيته هرولة ) رواه البخاري ومسلم
طيب اخيرا راح أشارككم اكثر عشرة اشياء تسعدني واسويها بشكل يومي تقريباً 😻💕
١- الصباح واشعة الشمس داخل البيت
من اكثر الاشياء اللي احبها واحاول قد ماقدر اني ما أفوتها هيا قومة قبل الفجر. هذا الوقت الهادئ احب اصحى على رواقه اصلي ركعتين واطلع امشي في الجو الجميل اتأمل جمال السماء والنجو واحاول استغفر الين يأذن، اصلي واطلع مره ثانيه اقول اذكار الصباح للشروق واستمعت بجماله وأنزل افتح كل شبابيك البيت واسمح لأشعة الشمس الجميله تدخل تعطي حياة وجمال للبيت لمن يبدأ اليوم كذا احس انو بدأت يومي صح وسرت اسعد انسانه في الحياة 😌🌞💜
٢- القهوه وريحتها
القهوه وجمال لونها وريحتها في البيت، تخليني ابتسم لاشعورياً كأنو احد قلي كلام حلو مثلا واسعدني. احس مع القهوه كذا كأنها تقولي كلام حلو كل صباح وتسعدني بجمالها وطعمها 🖤☕️
٣- الرياضه
بعد الفطور بساعتين تقريبا احب اسوي رياضتي الصباحيه، اكون مجهزه فيديو في اليوتوب يحمسني ويدخلني في الجو. تقريبا ساعه ونص ساعتين من وقتي كلها اقضيها بمتعه وانا اسوي رياضه. وبعد ماخلص احس بالانجاز والحب لنفسي وبالسعاده الابديه 😂💕
٤- اخذ حمام هادي لطيف واستخدم كل شي احبو بروقان وهدوء وجمال
بعد ماخلص من رياضتي يجي وقت الجمال والعنايه. احب احط ماسك على وجهي وشعري لانو بعد الحماس حتكون المسام مفتوحه ف استغل الفرصه. استرخي في باث بارد جميل مع ريحة الصابون والمقشر والشموع المنعشه وضوء الشمس الجميل.
٥- اتواصل مع الناس اللي احبهم واخذ جرعة ايجابيه.
احب اكلم صحباتي ونتكلم عن صباحنا وكيف بدأ يومنا وعن كل شي جميل من رياضه لكتب لمنتج جديد عاجبنا او اي شي لطيف زي كذا. احب انو كل الناس اللي حوليا يكونو ايجابيين ويضيفولي في يومي جرعة سعاده
٦- القراءه
وقت الظهر عندي هوا وقت الاسترخاء والقراءة امتع اوقاتي لمن اصلي الظهر واجي انسدح ع سريري مع كتاب خفيف، لطيف، جميل. حاليا اقرأ كتاب لاوبرا اصنفه من الكتب السعيدة الجميله اسم الكتاب What I Know For Sure
٧- الجمعات العائليه اللطيفه/زيارة الصديقات الجميلات
احب بعد المغرب نتجمع ونشوف الناس اللي نحبهم، جده تزورنا وتحكينا عن يومها اللطيف في التحفيظ او جمعه مع ماما وجدة وخالاتي الله يحفظهم نهاية الاسبوع، اجواء لطيفه جميله ومريحه. ❤️🙏🏼
او جمعه مع صحباتي اللطيفات، نزور بعض ف البيت او نخرج نفطر برا ممكن او نروح بعد المغرب كوفي شوب صغير نستمتع بوقتنا فيه مع ريحة القهوه الجميله والحلا اللي راح نندم اننا اكلنا 💜💕😂
٨- التصوير
احببب لمن اصحى الصباح بدري استغل وقت الشمس الجميل واصور، كل صورة اصورها تسعدني. احب الابداع اللي يطلع وقت التصوير في تكوين الصوره واستغلال ابسط الاشياء المتوفره عندي لتكوين صوره جميله وممتعه للنظر 😻🙌🏼🖤
٩- اليوتوب + مسلسلاتي الاسبوعيه
اليوتوب يعتبر من الاصدقاء المقربين 😌💕 احب اتابع فيه قنوات لناس احس ينفع نسير صحبات واستمتع مره بفيدوهاتهم وابداعهم وحسهم الفني الجميل او حياتهم البسيطه اللي تكون نوعا ما مشابهه لحياتي.
مسلسلاتي الاسبوعيه جزء من الروتين الاسبوعي، احبها مره واحب الشخصيات والقصص وتطورها لكل شخصيه. احسهم عائلتي الخياليه بالذات لمن يكون المسلسل ينعرض لسنوات ☺️💜
١٠ ليالي الصيف الجميله
احب الجو المكتوم شويا مع هوا خفيف وهادئ وسماء صافيه ونجوم ساطعه. الصيف تقريبا هوا وقت المناسبات ف اغلب الاوقات تحسي بجو العزيمه الجميل بخور وقهوه وريحة العطور سوا تحسيها ايام سعيدة برغم انو نشمها في اي وقت لكن عندي لها طعم ثاني في الصيف 😌🖤
ان شاءالله تكونوا استمتعوا بالقراءه ودخلتكم في جو سعادتي مع الاشياء البسيطه. شاركوني اكثر شي تحبوه ويسعدكم، واتركولي روابط لمواضيع مشابهه عندكم.
اتمنالكم يوم سعيد وجميل ولطيف 💕🙏🏼
أهلين يا جميلة .. موضوعك كثير حلو حمستيني وعلى فكرة في كذا نقطة متشاركين فيها .. قومة الصبح والتصوير والقهوة .. من اكثر الاشياء اللي تفاصيلها تدخل السعادة في قلب الشخص .. ��������
ReplyDeleteحبيبتي انتي شكرا لك على لطافتك
Deleteجداً استمعت و انا أقرأ 😻 و اكتشفت انو بيننا أشياء مشتركة 💞 اجواء الصباح و التصوير و اليوتيوب و المسلسلات و و الجمعات العائلية اللطيفة و من الأشياء الي مرا تسعدي المشي في الهواء الطلق مرا يغير النفسية وأهم شي وقت العناية وتدليع النفس 💅🏼
ReplyDelete