Sunday Riley U.F.O. Ultra-Clarifying Face Oil Review // تجربتي لزيت البشره يو اف او من سندي رايلي

بسم الله الرحمن الرحيم

كيفكم ياجميلات 

☺️💕

 قبل كم شهر طلبت مجموعة كريمات للبشره من نوردستروم ومن ضمنها زيت البشره من سندي رايلي

هذي الماركه اشتهرت من فتره بجودة منتجاتها وسرعة نتائجها فقررت اخذ اكثر ٢ ناسبوني وعليهم مدح كثير

معلومات عامه عن المنتج
 هو عباره عن زيت منقي ومعالج للبشره، تمتصه البشره بسرعه، يعالج الحبوب واثارها، الرؤس السوداء
والمسامات المسدوده ويترك البشره ناعمه ونقيه من الشوائب

من المكونات المهمه الموجوده في المنتج

فيه سلاليك اسيد بنسبة ١.٥٪  ، وزيت شجرة الشاي وبذور الكمون السوداء لتنقية الجلد
من الحبوب واثارها

 زيت بذور الخيار لتغذية الجلد ولتخفيف وتحسين من مظهر الخطوط والتجاعيد في الوجه من غير مايترك بشرتك دهنيه

كمان بابونج وزهرة البرتقال لتهدئة البشره القابله للشوائب

licorice و كمان  hexylresorcinol ولتفتيح اثار الحبوب والبقع في البشره موجود فيه

هذا المنتج يستهدف البشرة الدهينه، المختلطه، والبشره القابله للحبوب

الهدف الاساسي منه علاج الحبوب واثارها والرؤس السوداء
 مع محاربة الخطوط والتجاعيد بسبب بعض المكونات الموجوده فيه

☺️🌚طيب نجي لنوع بشرتي وقرقره بسيطه عن تاريخ عنايتي وتجربتي للمنتج

نوع بشرتي دهنيه/ مختلطه احيانا حسب الجو
بشرتي قابله للحبوب وعندي اثار خفيفه لكم حبه

 قبل كم سنه استخدمت الروكاتين، كنت اخذ جرعه مخفضه منه ل٨ شهور
بعد ماوقفت العلاج استمرت بشرتي في التحسن الين خلصت سنتين تقريبا
بعد السنتين هذي خرج الروكاتين من جسمي وردة الفعل الاولى انو رجعتلي حبوب تخوف اكثر من اللي كانت عندي
كانت في خدي تحت بس وفي الجمب مكان الكونتور كونت مره مصدومه من حجمها ومره تعبت نفسياً من المنظر
وكونت احاول اعرف ايش الغلط اللي سويته لا استخدمت منتج جديد ولا احط ميكب كثير مادري ايش سببها بعد ماقريت كثير اكتشفت انو احتمال كبير يكون ردة فعل بس، لانو الروكاتين في هذاك الوقت كان دوبو خرج من جسمي
ماقولكم قد ايش حاولت اعالجها بشتى الطرق لدرجة فكرت ارجع استخدم العلاج
بس بعد شهرين تقريبا من غير تحسن ويأس وقهر قررت اطنش الموضوع واهتم بس اهتمامي العادي

هذيك الفتره كان روتيني في العنايه هوا غسول وكريم مرطب وماسك طبيعي مع شرب المويا تقريبا لترين في اليوم
خلال سنه تقريبا بشرتي رجعت احسن وافضل من ماكونت اتخيل لدرجة كونت عادي اخرج من غير ميكب وكل ماطالع فوجهي احس بالامتنان والشكر لربي اني مانحوجت ارجع للعلاج وبشرتي رجعت٩٠٪ افضل من احلامي

كونت اعاني بس من اثار بسيطه جدا ولاتذكر والسر كان كلو في اهتمامي البسيط مع كمية المويا اللي اشربها
قررت اني اجرب هذا المنتج واشوف اذا يساعدني اتخلص من الاثار والحبوب اللي تطلعلي فتره وفتره

استخدمت يو اف او قبل كم شهر لمدة ٣ او ٤ اسابيع بشكل منتظم في الليل وكل ماخرجت يعني مره في اليوم بس اذا خرجت استخدمه مرتين لمن اخرج ووقت النوم
وما اخفيكم سرا انو لاحظت فرق في اول مره استعملتو، الشي الاول اللي لاحظته انو شكل بشرتي كان مره صحي فيه لمعه صحيه، نظاره، وشكل بشرتي سار كذا زي القطنه ناااعم ناااعم وفيه كذا نفخه حلوه
زي لمن تصحي من النوم مثلا، مو البشره كذا تكون منفوخه عن اي وقت ثاني وتحسيها صافيه بزياده وفاتحه اكثر من العاده؟
هذا الاحساس احسو كل يوم وطول الوقت تقريبا بعد ماستخدمت هذا المنتج لدجة بطلت استخدم ميكب اغلب الوقت لانو احس حرام بشرتي احلى من انو اغطيها بطبقات فاونديشن
🙏🏼😩

اغلب اثار الحبوب خفت بشكل كبيير وملحوظ الين اختفت تماما ولاحظي اغلب مو كلها كلها
بالنسبه للمسامات ماعندي مشكله كبيره فيها بس اتحسنت مره وسار شكلها اصغر من دبوس الابره عاد الله يعنيكم ع الوصف بس احاول اوضحلكم الصوره والرؤس السودا نفس الشي ماعندي مشكله كبيره فيها بس بشكل عام بشرتي سارت ٧٠٪ افضل

لاحظي ٧٠٪ لانو روتيني الاول كان افضل ٩٠٪ عن السنوات اللي قبل وهذي ال٧٠ الجديده افضل مقارنه ببشرتي بعد ماتحسنت ان شاءالله يكون كلامي واضح واتخيلتو الصوره معاياه
😬🙌🏼

يو اف او ممكن تستخدميه برايمر تحت الفاونديشن وجربته مره وحده لاني بعدها ماحطيت ميكب وكان جمييييل جداااا يعطيكي نفس النتيجه الجميله مع الفاونديشن كمان، نظاره ونقاء واحس بشرتي صحيه من جوا كانو ماعمرو جاتني حبوب واثار وكذا

طيب للتجربه بس وقفت استخدام المنتج لشهر تقريبا بس عشان اشوف كيف بشرتي تسير
اللي لاحظته انو بشرتي سار يبان عليها الاهمال والتعب بشكل بسيططط جدااا جدااا
طلعتلي كم حبه وبقت اثار بسيطه لها بس كان بشكل عام البشره احلى من قبل ماستخدمه
يمكن كان الفرق بسيط قبل وبعد عشان المده اصلا قليله او يمكن عشان المنتج كويس او يمكن عشان اشرب مويا كثير ف بشرتي تستمر في التحسن ام نت شور

بس اللي اعرفه اكييد اكييد انو اهتمامك ببشرتك من برا بس مستحيل يجيب نتيجه مرضيه او تفيدك ع المدى البعيد
اذا ماهتميتي بنفسك من جوا من ناحية اختياراتك في الاكل وكمية المويا اللي تشربيها اذا كانت كافيه ولا لا

انا بشرتي صعبه شويا وماكونت احلم اوصل لهذي النتيجه الحمدلله بفضل ربي اولا واخيرا
بس لاحظت انو لو احط افضل منتجات العالم كلها في وجهي ماراح تبين نتيجتها الا اذا اهتميت بالاكل والشرب
يعني الاثنين كلها مهمه وتساعد بعض وانتي لك الخيار اولا واخيرا

اخيرا، راح ارجع اطلب المنتج الحجم الكبير هذي المره وراح استخدمه كل ماحسيت نفسي احتاجه
😌💕 وان شاءالله اوصل لمرحله افضل وافضل مع الاهتمام والحب والعنايه

اذا حابين تجربو المنتج  اقري عنه كثير الين تقرري انو يناسب بشترك ويناسب احتياجتك
واذا حابين تقروا عنه تلاقوه في الرابط تحت

Sunday Riley U.F.O Face Oil

وبس ان شاءالله افدتكم بشي لو بسيط واستمتعوا بالقراءه عن شي ممكن يكون يناسب احتياجاتك او نفسك تجربيه او جديد عليكي
وشكرااا جزيلا لقرائتك
🙏🏼❤️💕