شوربة القرع الصحيه // Healthy Squash Soup

بسم الله الرحمن الرحيم 

كيفكم ياجميلات 😌❤️💕

وانا ابحث في بنرست عن طريقة طبخه سهله وصحيه لقيت هذي الشوربه المفيدة اللزيزة في الهوم بيج ❤️😻 

أول مره سويتها قبل سنتين وكل مارجع موسم اليقطين والقرع اسويها بنفس الطريقه او اغير عليها على حسب ماحب واشتهي في ذاك الوقت 🖤

الطريقة الاساسيه لها فيها كم شي مو صحي فاستبعدتها واستبدلت الاشياء اللي اقدر عليها بمكونات صحيه 

عشان تكون مفيدة اكثر وماحس بالذنب لمن اكلها 🌚

المقادير: 

قرع حبه متوسطه او كبيرة تكفي تسويلك كمية كويسه 

بصل موف حبه كبيرة 💜😬

فلفل رومي اخضر حبه كبيره 💚

جزرة وحدة

كزبرة 

ممكن لو تحبي تكون حاليه اكثر تضيفي حبة تفاح اخضر

الطريقة: 

تحطي كمية مناسبة من المويا في قدر للسلق 

تقطعي القرع قطع كبيرة وتحطيها ف القدر 

تضيفي معاه الجزر وقبل مايستوي ب تقريبا ١٠ دقايق تضيفي البصل والفلفل وتسلقيهم سوا الين يسيرو ناعمين مره 

*القرع مره قاسي وصعب تقطيعه ممكن تستعيني بمساعدة احد يدو اكبر واقوى وسكينه كبيرة وحادة 😬

بعد ماتنسلق الاشياء سوا عندك طريقتين،

يا إنك تستخدمي الخلاط اليدوي اللي يخلط في القدر وهوا حار او تستني عليها تبرد وتحطيها في خلاط عادي 😌

بعد ماتبرد مره حطيها في الخلاط بالمويا حقتها عشان المويا تكون فيها فوايد الخضار ف حرام تترمي

بس حاولي انك من البداية ماتحطي مويا زيادة عن المطلوب عشان لاتسير كمية المويا كثيرة وتطلع الشوربه خفيفه بزيادة

او ممكن اذا تحبي الشوربة تكون ثقيله ومتماسكه تستبعدي المويا وتحطي ربع كاسة حليب قليل الدسم او اي نوع ثاني تفضليه

وتزيدي الكمية حسب احتياجك 

تضيفي معاهم كزبرة وتخلطيها الين تسير ناعمه مره وترجعيها القدر 

وتحطي ملح وفلفل واي اضافة ثانيه تحبيها وتحميها وبس بالهناء والعافية 🖤💕

من فوائد القرع: 

١- يقوي جهاز المناعه 

٢-يقوي النظر والعظام 

٣-ينظم الدورة الدمويه 

٤-يقلل من الاصابة بأمراض القلب 

٥-غني بفيتامين C و A ومعادن كثيرة منها المغانيسوم وحمض الفوليك وغيرها 

أتمنالكم يوماً سعيداً جميلا ❤️💕

6