walking under the stars // المشي تحت النجوم

بسم الله الرحمن الرحيم 

​السلام عليكم صديقاتي ​

❤️​💗​

من الاشياء اللي احب اسويها احيانا اني اصحى في وقت متآخر من الليل واطلع امشي ، ماسوي شي بس اصحى احيانا اصلي الليل واشرب مويا واطلع امشي. بس انا لحالي من غير ماخذ جوالي او اي شي ،، استمتع بالهواء الخفيف اللطيف قبل الفجر واتأمل السماء والنجوم الجميله لساعه او احيانا اكثر. 

المشي في هذا الوقت ممتع جداً، الهدوء والوحدة وجمال السماء يعطيني طاقة ايجابيه وسعادة ماتوصف. ابدا يومي وانا منتعشه للحياه ونشيطه وايجابيه واهم شي سعيدة.

احب اقضي وقتي لحالي امشي وابدا يومي بهذا الشي، يصفي ذهني ويرتب افكاري ويجمل يومي، اكثر الافكار جمال تبدا وانا امشي ومنعزله عن كل شي يشتتني.

الطبيعه وجمال الليل والنجوم والقمر وريحة الفجر واحيانا ريحة الخبز في المخابز تسعدني، تحفزني وتحمسني. احس اهم شي للانسان انو يستمتع بالطبيعه اللي حوله ويترك نفسه تحس بالجمال من غير مايحط فباله حر ولا برد شجر ولا صحراء. الطبيعه طبيعه بغض النظر هيا ايش والجمال جمال سواء شجر ولا صحراء، جبال ولا انهار كلها في النهايه تعطي طاقه ايجابيه وتخفف التوتر وتحفز على الابداع وتسعدنا سواء حسينا واستشعرنا هذا الشي او لا. 

مافوت هذي اللحظه ابدا من سنوات طويله وفي اي وقت ومكان لازم اخصص وقت اختلي فيه بنفسي وامشي فيه وافكر واسرح واحلم واذكر الله في هذا الوقت الجميل. وقت استشعر فيه بجمال خلق الله يذكرني بعظمته وبجمال صنعه وافكر بيني وبين نفسي باللي جمّل هذا الكون يعجزه انو يجمّلي حالي؟ احس ما اطفش ابدا لو ماحس بالالم في رجولي من كثرة المشي مارجع ادخل البيت. 

حتى لمن اكون زعلانه ولا طفشانه ولا ورايا أشغال كثير موترتني، المشي يخفف عني بس امشي وارفع راسي للسماء أتأمل النجوم وجمالها واشم هواء يخف كل شي ويهون.

الحمدلله 

الصوره في تركيا ٢٠١٦ - ايفون٦

2