fall lips // ارواج الخريف

بسم الله الرحمن الرحيم

السلام عليكم 

🍁🖤

اكثر شي احب استعمله في المكياج هوا الارواج والمسكارا 

روج ومسكارا تكفيني في اغلب الاوقات 

مع الارواج احب الالوان اللحميه المشمشيه غالباً

الارواج اللي يكون فيها لمحة لون بُني أفضلها 

كنت نادراً ماحط روج واضح وصريح زي الارواح الغامقه 

الاحمر والبني الغامق، الموف الغامق مره قلييل كُنت احطها 

بس في السنتين الاخيره سرت استمتع بهذي الالوان كثيير واحسها مره تغير اللوك وتضيف لمسه جميله للميكب ككل

ف احب استعملها بين فتره وفتره ع حسب مزاجي والميكب اللي حاطته وكذا 

هذي مجموعة ارواج خريفيه حابتها من فتره بعضها جديد وبعضها لا استخدمها في الخريف غالبا

Mac - Mocha lipstick (satin)

هذا الروج من ماك اخذته قبل كم شهر واحبه مررره مايخرج من شنطتي بغض النظر عن اي روج اكون حاطه 

هذا الروج مايطلع من الشنطه ابدا 

حلو مع اي ميكب تحطيه ماحس نفسي لمن احطه اني حاطه روج مره نااعم ع الشفايف وثباته متوسط نوعاً ما

ماحس لمن احطه اني احتاج كل شويا اعيد عليه جميل جدا ودرجة اللون مره تجنن، اللون جاي مشمشي غامق شويل زي  حبة البندق تقريباً 🌰

ينفع لكل يوم، لدوام لزياره حتى مره حطيته في زواج ماعندي مشاكل لمن احب شي يعني احبه ماستغني عنه واحتاج اشتري جديد لانو مخلص 

🙌🏼🍁👀 

Rimmel London Kate Moss lipstick - 29

روج كيت موس من ريمل لندن، جميل وجديد عليا هذي الالوان
اللون موف على لمحه من الفوشي ماحب احطه لوحده احسه مو لوني ف احط تحته روج موف اغمق منه
يطلع مره حلو. الروج كريمي ويطبع اذا شربت او اكلت، حلو وسعره رخيص كمان

Lancome Rouge In love - 275m

هذا الروج الجميل من لانكوم اخذته من فتره طوييله وكنت مره ماحب استعمله الين قريب 

لونه تقريباً عودي على لمحة بُني وموف غامق مدري ماني قادره احدد اللون بس السواتشز في النت تطلعه انو لحمي

وهوا مره غامق 

مكتوب في موقعهم انو يبقى وقت طويل لمدة ٦ ساعات صراحه مايبقى اكثر من ساعه، ساعتين ع حسب ولازم اعيد عليه ويطبع فكل شي

احسه يشبه الفازلين شويا من ناحية الفورميلا بس على انعم شويا مو بنفس ثقل الفازلين

مره مريييح ع الشفايف لمن تحطيه تحسي كأنه مرطب 

انا أحب استخدم قبله محدد شفايف على كل الشفايف عشان يثبت أكثر 

👀🖤

Kat Von D - Nahz Fur Atoo

ارواج كات فون دي من أفضل الارواج المطفيه اللي جربتها مره جميييله وماتنشف شفايفي وتخططها زي ارواج كلربوب مثلا

هذا الروج منهم جميل مره، اللون احمر غامق، بس يطلع عليا اغمق من اللي في الصوره وكمان لونه من الالوان اللي تطلع الاسنان بيضاء :))

هذا اللون من الالوان اللي لازم ارسم شفايفي قبل بمحدد شفايف، نفس اللون او لون مشابهه لانو يطلع مكتل في جهات وخفيف في جهات ثانيه لو ماسويت كذا 

جميل مره ومايطبع ع الاشياء لمن اشرب مثلا بس في الاكل يخف ولازم اعيد عليه 

ثباته كويس تقريبا لو حطيته ٦ ساعات مثلا احتاج اعيد عليه مره بس اذا أكلت وشربت 

🌚🙌🏼

Mac - Paramount (satin)

اخر شي هذا الروج الجميل من ماك يجي عليا بني حقيقي، غامق بس حلو مايكتم الميكب،  نفس اللي قبل مريح على الشفايف ماحتاج اعيد عليه غير مره اذا احتجت 

وبس شاركوني ايش الارواج الخريفيه اللي تحبوها او ماعندكم ارواج مخصوص لهذا الموسم من السنه؟

شكراً لقراءتك 

🙏🏼❤️