بسم الله الرحمن الرحيم
السلام عليكم جملااتي
اليوم التدوينه الخامسه من التحدي، بعد معاناة مع التصوير وحوادث بسيطه من النار اللي في الشموع الحمدلله خلصت تصويرها وكتابتها في يومين ويعتبر انجااز ليا ف ان شاءالله تنال على اعجابكم 😌
من العنوان التدوينه حتكون عن مجموعة مفضلات متنوعه ناسبتني الفتره الاخيره وعجبتني جدا برغم بعض العيوب المصاحبه لبعض المنتجات. طبعا كل واحد وذوقه ونوع بشرته، المنتجات ماتوقع تناسب الجميع ف يحتاج منك البحث عن المنتج اللي ممكن اكون حمستك عليه بوصفي العميق جدا والمفيد الى مالا نهايه 🙃💔
بس منجد ان شاءالله تعجبكم الصور ع الاقل 🌚✋🏼
غسول Youth To The People
هذا الغسول الجميل اخذته من نوردستروم قبل فتره، ماقيد سمعت عن البراند هذي بس عجبني اللون وعجبني انو مكوناته بالكيل والشاي الاخضر والسبانخ مرره حمسني كمان انو vegan.
هو غسول جيل، فيه مضادات للاكسدة لتنظيف يومي للبشره، يناسب جميع انواع البشره. مره لطيف ع البشره ماينشفها ابدا وتنظيفه ممتاز مره حبيته والريحه جميييله كمان كأنه سموذي. مكتوب انو ينظف الميكب كويس انا استخدم غسول ثاني للميكب ف ماقدر احكم عليه من هذي الناحيه بس بشكل عام عاجبني مره مررره لاستخدام يومي 🌱🍃
سيرم Good Genes من ساندي رايلي
هوا سيرم معالج للبشره فيه لاكتيك اسيد يقشر الجلد الميت وينظف المسامات ويخفف التجاعيد او الخطوط الرفيعه في البشره. يعالج البشره من التصبغات ويخلي البشره صحيه وصافيه ونضره وفاتحه. يناسب جميع الاعمار.
من مكوناته عرق السوس للتفتيح والصبار لتهدئة البشره وعشب الليمون للخطوط في البشره وللتفتيح. كل شي مكتوب عن هذا المنتج صح صح صح جميييييل جدااااا افضل سيرم جربته في حياتي فعلا تلاحظي الفرق في بشرتك، نضاره ونظافه يفتح التصبغات ويصغر المسام ويخلي بشرتك احلى واصغر ب ٣٠ مليون سنه من الشكل الحالي راح ارجع اشتريه للابد من كثر ماعجبني وماما كمان نفس الشي بشرتها سارت كأنها في العشرينات ماشاءالله مره ممتاااااز 🍃🍋🌵
زيت ساندي رايلي
اتكلمت عنه قبل في تدوينه بس بأختصار هو زيت معالج للبشره، يعالج الحبوب واثارها والخطوط الرفيعه والتصبغات لاحظت فرق ف
بشرتي بعد ماستخدمته ومن المنتجات اللي راح ارجع اشتريها 🙏🏼🍃
كريم العين من كيلز
غني عن التعريف ماتوقع احد ماجربه وحبه، ترطيبه عالي جدا، يساعد على التخلص من الخطوط حول العين والانتفاخ والهالات. ماما لاحظت تحسن في الخطوط والانتفاخ حول العين انا بس احب ترطيبه ماعندي مشكله واضحه من هذي الناحيه عشان اقدر الاحظ تحسن فيها بس بشكل عام ممتاز ✋🏼💕
مرطب الشفايف من Sierra Bees
اخذته من ايهرب، نكهته بالنعناع جميل صراحه حبيت ترطيبه مره يمكن افضل مرطب شفايف رخيص جربته مؤخرا . احب احط منو قبل اي روج بالذات المات او ليب لاينر جميل وماتحسي يخلي الروج يتزحلق ولازم تمسحيه مدري واضح قصدي ولا لا وكمان حجمه حلو ورخيص ٨ حبات اخذتها ب ١٠ ريال كان عليه تصفيه في الموقع ☺️💚
تونر الويتش هيزل بتلات الورد
اخذته من ايهرب برضو ناسيه سعرو بس رخيص، ريحتو حلوه زي موية الورد. احب استخدمه خلال اليوم لمن احس وجهي بدا يدهن، ينظف لي الدهون واحسو يعطي بشرتي نضاره ونظافه. جميل وافكر ارجع اشتريه ان شاءالله.
ماسك الكولاجين من ماريو بداسكو
ماسك الكولاجين اشتريته من كم شهر، احب استخدمه مرتين في الشهر حبيته مره لطيف على البشرة. احطه على وجهي ١٠ ل ٢٠ دقيقه بالكثير وبعد ماغسله احس بشرتي صافيه وناعمه ومنوره احسه يساعد ع تفتيح الاماكن اللي فيها اثار حبوب او تصبغات بس مو مره بشكل واضح وسريع يعني ممكن يفيدني ع المدى البعيد اكثر من ذحين من هذي الناحيه ومن ناحية التجاعيد كمان.
مافكر ارجع اشتريه لانو سمعت كلام مو كويس عن هذي الماركه انو يستعملو مكونات تضر البشره وكذا في منتجاتهم. عندي ماسك ثاني منهم لاحظت اني كل ماستعمله يطلعلي حبوب وبشرتي تسير سيئه فقررت ماعاد اشتري شي منهم مره ثانيه بس ماسك الكولاجين تمام الى الان حابته مره 😌✋🏼💕
مقشر لوكسيتان Verveine 🌿🍋
اول شي اسمه ذكرني ب مسلسل the vampire daires لمن كانو يحطو الفرفين ف المويا ولا السلسله والخواتم عشان الفيمباير مايشربو دمهم عاد انا مره وفيه لمسلسلاتي ف اخذته لهذا السبب 🌚🖤
بس ماندمت ابدااااا ريحته تجننن كذا تحسيها حامضه ليمون ورقة الليمون ريحة السعاده مره تجنن وخايفه يخلص ف استعملته بالعدد ٦ مرات لاماكن معينه في الجسم مو كل جسمي مدري ليش خايفه مالاقيه لو خلص 🌚💚 بس تقشيره مره حلوووو ويخلي الجسم نااعم مره ورطب لانه من مكوناته زبدة الشيا احبه كل ماستعمله احس وجهي يسير كذا من جمال التقشير 😳😻🙌🏼
كريم اللوز لليدين من لوكسيتان
كريم اللوز ريحته حلووه مره وخفيفه مو مزعجه ابدا وترطيبه ممتاز. احس يدي رويانه طول اليوم لمن استخدمه ومايروح مع الغسيل بسرعه مره جميل 💚💕
هايلايتر توباز من جوير Jouer، Topaz
هذا الهيلايتر اخذتو من نوردستروم مدري اذا يتباع عندنا او لا بس سمعت عليه مدح قبل فتره ولمن شوفته اتحمست اشتريه وماندمت مره حبيته، يعطيني لمعه صحيه لبشرتي، يعني باين حاطه هايلايتر طبعاً بس مو ثقيل زي مثلاً ماري لو من The Balm. انا مره يهمني يكون الهايلاتر ناعم على البشره ومايطلع عيوبها ومايكون فيه قلتر او شمر مره واااضح احسه مايناسب بشرتي ابدا فهذا مره حابته ومناسبني بس اذا تحبي الثقيل ممكن مايعجبك بالرغم انو ممكن تثقليه بكم طبقه اذا تحبي. هما كاتبين في وصف المنتج انو “lit from within” والفورميلا كريمي على بودرة جميله مرره. لونه على ذهبي على برونزي على تكه نحاسي مادري كيف بس مره اللون يجنن ويناسب اغلب الوان البشره. ☺️👌🏼
ايشادو انستازيا Prism
هذي الباليت من انستازيا اخذتها قبل فتره عشان اللون الاخضر مره عجبني "حجه لنفسي عشان اشتريها من غير تأنيب ضمير" 👀💔، ما آحسها من الباليتات اللي ممكن اي وحده تستفيد منها وتستخدم كل الالوان الا اذا كان عندك خبره وتعرفي تسوي مكياج مزبوط 👌🏼
الفورميلا مره تشبه modern renaissance
المات مره سهل استخدامها وتندمج مره مزبوط وجودتها ممتازه وتبان من اول مره، الشيمر والمتاليك كمان مره جميله وسهله وواضحه مره لمن تحطيها لوحدها ولمن تحطي معاها فكس بلس تسير اوضح واحلى او بأصباعك بكل الحالات تطلع جميله وواضحه، احيانا احط لون شيمر فاتح مع فيكس بلس واحط فوقه لون اغمق بأصباعي فالنص ف يسير كأنو حاطه تكه قلتر والالوان طالعه حلوه سوا، مثلا استخدمت مره Pyramid حطيت فوقه في النص بس بأصباعي Eternal مره طلعوا حلوين سوا 👌🏼
اللون Throne جربته لوحده مع لون خفيف ع كسرة العين، جميل جدا بس حسيت افضل لو استخدمت تحته ايلاينر كريمي اسود او ابيض عشان يثبت اللون اكثر في مكانه ويبرزه اكثر بس فكل الحالتين جميييل مره
وانا العب في الالوان استخدمت اللون الاصفر الصارخ Sphere على كسرة العين مع Lure وفوقهم نقطه من Parallel عشان يهدئ الشكل اكثر وحطيت ع الجفن اللي تحت كسرة العين بأصباعي شويا من اللون Sphinx بس عشان بجرب كيف تطلع الالوان هذي ولفتني اللون الاصفر ف حبيت اجربه وطلعت النتيجه مرضيه 👌🏼
وانا العب في الالوان استخدمت اللون الاصفر الصارخ Sphere على كسرة العين مع Lure وفوقهم نقطه من Parallel عشان يهدئ الشكل اكثر وحطيت ع الجفن اللي تحت كسرة العين بأصباعي شويا من اللون Sphinx بس عشان بجرب كيف تطلع الالوان هذي ولفتني اللون الاصفر ف حبيت اجربه وطلعت النتيجه مرضيه 👌🏼
بس بصراحه لو مبتدئه مانصحك فيها الوانها ماتناسب الجميع والعمل بيها يحتاج وحدة عندها خبره بالميكب مو خبيرة تجميل بس خبرة عاديه يعني😸💔
بشكل عام مره احبها وماستعمل غيرها مؤخرا باليت جميله والوانها وتناسقها سوا اجمل جربت كل الالوان بس حبيت اتكلم عن اللي لفتنتي اكثر اول ماستخدمتها وكمان مابا اطول في القرقره 😬💔
بلشر ماك Gingerly و برونزر فيزشان فورميلا “Physicians Formula, butter bronzer “light bronzer”
بلشر ماك Gingerly مرررره لونه جمييييل ع البشره وناااعم مره مو من الالوان الصارخه لمن احطو يعطيني لون جمييل خفيف والفورميلا كمان جميله ماتحسيها بودره مره ولا كريمي حبيتها مررره اتوقع ذا اللون من الالوان المحبوبه عند كثير من الناس والله اعلم، بس انصحك تجربيه لو زرتي ماك ع يدك اول ماشوفت اللون حسيتو باهت شويا ع يدي بس ع الوجه جمييييل وطبعا تقدري تثقليه لو تحبي الثقيل بس درجة اللون ممتازه مو مره على اورنج ولا مره على برونز تحسي في النص 👌🏼
برونزر فيزشان فورميلا اخذته من ايهرب درجته “light” بعد ماشوفت كاثلين من Kathleenlights في اليوتوب تمدحه كل فيديو تقريباً ومره كان يعجبني عليها بس حسيت اللون ممكن يطلع فاتح عليا بزياده ولمن اشتريته وجربته طلع البرونزر البيرفكت من ناحية اللون الاجمل من اجمل شي في الحياه او الفورميلا الناعمه اللطيفه اللي كذا تجمل بشرتك وتعطيها اللون الجميل جدا جدا مع لمعه صحيه وحلوووه مرررره مررررره. من اسمه butter bronzer منجد مره زبده ع البشره اتعب اقول قد ايش مررره حللووو احيانا اكتفي بيه لوحده من غير بلشر من كثر ماهو مره موتني من الجمال 🌞😂🙌🏼
عيبه الوحيد انو العلبه حقته سيئه لابعد درجه، ماتقفل ابدا ماسمع التك حق التقفيل يعني وبس دقه بسيطه تنفتح لانها اصلا مفتوحه لكن جمال اللون والفورميلا 🌚💔
بس اذا بشرتك اغمق من حنطي ممكن مايعجبك ماقدر احدد بس اتوقع 🤔
بس اذا بشرتك اغمق من حنطي ممكن مايعجبك ماقدر احدد بس اتوقع 🤔
ماسكارا ديور Monsieur Big Mascara
مسكارا ديور اشتريتها بعد ماشوفت الانا من Allana Davison في اليوتوب تمدحها كمان فكل فيدوهاتها واشوفها على رموشها مره حلوه ماشاءالله. انا ماحب البس رموش كثير احسها اوفففر البسها في المناسبات بس واحيانا اقص نصها او استخدم اللي بالحبه عشان احب اللوك الطبيعي اكثر، تعجبني ع الناس بس انا ماحبها. ولذلك يهمني مره المسكارا تكون ممتااااززززه، رموشي كثيفه وطويله تكه (استخدم لها زيت خروع) يعني الموضوع مره جدي عندي 😀✋🏼 بس المسكارا الممتازه تخليها مررره حلوووه لدرجة بكل ثقه اشوفها احلى من الرموش التركيبه 😆 هذي المسكارا تطلعها في احلى صوره ممكن اتخيلها قبل كونت اعشق بيتر ذان لوف حقت تو فيسد واشتريتها مليون مره بس هذي غطت عليها جممممييييييله بس زي اي مسكارا احسها اجمل بعد اسبوع لمن تبدا تنشف تكه 😌👌🏼
روج كات فون دي Hawkwind
احب ارواج كات فون دي مررررره مره مره مره بس هذا اللون عجبني اكثر عشان لونه فقط الفورميلا مو زي باقي ارواج كات فون دي احسها شويا سيئه ولازم تحطي تحته لاينر ولا يسير كذا مو متساوي ع الشفايف جمب فيه لون كثير وجمب لا وهذا عيبو الوحيد بس جمال اللون يشفعلو والله مره حابته 🌚🖤
مناكير OPI
هذي اللونين اخذتها قبل كم سنه من سيفورا لمن كان سعرها ب ٤٩ 🌚💔 جميله مناكير او بي اي مره بس ماتستاهل سعر اعلى من ٥٠ في رأيي 😌✋🏼
اللون الاحمر Big Apple Red، كلاسيك مره واحبوووو ع يدي مره عاجبني الفتره هاذي واحب احطه لمن اظافيري تكون قصيره احسه مره اجمل من لمن تكون طويله وكلاسيك اكثر
اللون الثاني اسمه Over The Taupe: من اسمه بيج ع رمادي احبببببه مررررره من ايام الجامعه وانا احطه كل يومين تقريبا الين طفشت منو ورجعت استخدمه الفتره هذي يجنننن احب احطه لمن اظافيري تكون طويله احسو يعطي شكل اجمل لليد ويطول يدي لانها قصيره شويا 🌚
اللونين كلها حلوه من ناحية الفورميلا طبقتين تكفي تطلع اللون واضح وجميل 👌🏼🖤
عطر ديور Blooming bouquet
( مكوناته: اليوسفي الايطالي، بيوني، والاساس المسك الابيض) 🌸💐
واحد من افضل العطور عندي في الفتره الاخيره، من عطور السعاده والجمال والربيع
ريحته جميله جدا، من اسمه كأنه بوكيه ورد في قزاز، ريحته كأنها حديقه ورد في الربيع والجو حلو والسماء فيها سحب مع شمس ساطعه بارده ولطيفه تحسي كذا سعااااده حرفياا لمن اتعطر منو بس ابتسم ومزاجي يتغير ١٨٠ درجه 💜💕❤️
مشكلته الوحيدة انو مايثبت عليا ابدددا بالكثير يعني ساعتين او ٣ ساعات مره ريحته خفيفه وانا من الناس اللي ما أفضل الروايح القويه لعطر يومي أمل منها بسرعه بس هذا خفيفه بزياده لدرجة اذا فيه احد حاط عطر قوي او بخور مثلا تضيع ريحته مره وماتشميه.
غالبا احب احطه في الصباح احس هذا وقته واستخدمه في البيت اكثر من الخروج لانو زي ماقولت الريحه ماتثبت وخفيفه بس اعشقه ف مايهم☺️💕💐
عطر كلوي Love Story
(من مكوناته: زهرة البرتقال، ياسمين، خشب الارز) 🍊🌿🌼
هذا العطر الجميل اول ماشميت ريحته ماحبيته، حسيتو عادي ومايستاهل الضجه بس كل ماشميته اكثر كل ماحبيييته مرررره احس ريحته ناااعمه وفريش وخفيفه تحسيه لوحده تحب النعومه والورد والاشجار وبدأت اخرج عن الوصف🙃😬. احب احطه في العصر والمغرب ريحته تثبت بشكل جيد ماحس اني احتاج احط كل نص دقيقه احب احطه في الجمعات الخفيفه، او مثلا جمعة بنات في الاستراحه والجو جميل تحسي كذا ريحة الطبيعه والجمال. < الوصف يحزن 😬💔
##
وبس خلصنا الحمدلله بعد مليون سنه 🙃
شاركوني مفضلاتكم واذا عندكم مدونات فيها مواضيع مشابهه اتركولي الروابط في التعليقات وشاكره لكم قرائتكم ودعمكم ❤️🙏🏼
الله جميله التدوينة جربت كريم اللوز من لوكستيان جظا ترطييه رائع والعطر شميت ريحته عند اختي جدا جميلة ...شكرا على تدوينتك الرائعة
ReplyDeleteتسلمي حبيبتي من ذوقك ☺️💕
Delete