iHerb Haul // مشترياتي من ايهرب

بسم الله الرحمن الرحيم

السلام عليكم ياجميلات 

قبل كم اسبوع طلبت مجموعة اشياء جميله من ايهرب ومره كنت متحمسه انو اشاركها في المدونه بس قررت انتظر شويا اجربها واكتب رأيي عنها .. 

اشتريت شويا ميكب وسكن كير،  وشوية اكلات لذيذه حتكلم عنها بالتفصيل مع روابط مباشره لكل منتج 💚

من اليسار

E.L.F. Cosmetics, Makeup Mist & Set, Clear, 2.02 fl oz (60 ml)

هذا المنتج الجميل بخاخ للميكاج يحافظ على ثباته وعلى وضوح الوانه

:من مكوناته

الصبار، شاي اخضر، الخيار

 وفتامينات A,C,E  

اول ماستعملته ماتوقعت انو بيعجبني او بيفرق كثير عن غيره من بخاخات الميكب

بس للامانه مره عجبني وحسيت بفرق فعلاً في ثبات المكياج وفي شكله حسيت اعطى الميكب شكل صحي اكثر

ولمن مسحت مكياجي كان ملمس بشرتي مختلف عن دايماً وناعم مره عجبني ولاحظت انو بخه بختين تكفي مره 

مو زي المنتجات الثانيه اللي تزعم نفس الشي اتروش بيها واحس عادي بس هذا يبين اذا كثرت الكميه لانو يسير طبقه ع  البشره وتدهن بشرتي زياده ف بختين مره كفايه ✋🏼😀

عجبني وسعره مره رخيص ف يستحق التجربه من رأيي اذا الميكب شغفك 

Pixi Beauty, Shea Butter Lip Balm, Natural Rose, 0.141 oz (4 g)

مرطب الشفايف من بيكسي بيوتي

بزبدة الشيا حبيته خفيف على الشفايف وفيه لون ناعم وحلو استعمله دايما في البيت

او اذا مالي خلق احط روج يرطب الشفايف بس مو ذاك الترطيب اللي تعتمدي عليه طبعا

ترطيبه ٣٠٪ كويس بس يعتبر بديل حلو لاي وقت تحسي شفايفك ماتتحمل تحطيلها روج 

😬💚

E.L.F. Cosmetics, Beautifully Bare, Satin Lipstick, Touch of Nude, 0.13 oz (3.8 g)

الروج من ايلف 

اللون لحمي وقوامه ساتين جربته مره وحده ماحبيته عليا ابدا احس يخليني كأني تعبانه ماناسبني اللون

ولا حبيت شي فيه صراحه حتى الفورميلا حسيتو سايح بزيادة ماعجبني بس ممكن اذا حطيت تحته محدد شفايف يتغير

بس مافكر ارجع اشتريه ابدا 

😐😅

EOS, Lip Balm, Sweet Mint, .25 oz (7 g)

هذا المرطب الجمييل جدا جداااا جدااا 

احبه مره بصراحه وبالذات اللي بالنعناع احسه يجيبلي السعادة وترطيبه ممتاز يعني تقريا ٨٠٪ كويس 

مكتوب انو عضوي ٩٥٪ وطبيعي ١٠٠٪ وصنع بزبدة الشيا وزيت الجوجوبا 

هذي ثاني مره استعمله اشتريته عشان يذكرني بأيام جمييله ونسيت قد ايش كنت احبه 

☺️😍😩

Real Techniques by Sam and Nic, Base Powder Brush

Real Techniques by Sam and Nic, Blush Brush, Finish

فرش ريل تكنيك غنيه عن التعريف ممتازه وسعرها مناسب 

اخذت هذي الفرشتين الاورنج للباودر والفوشي للبلشر 

ناعمه وجميله وحبيتها ،، احس الفرش الكبيره ماتحط منتج كثير ع البشره ف مره ناسبتني

😻💚

Nature Republic, Soothing & Moisture Aloe Vera 92% Soothing Gel, 10.56 fl oz (300 ml)

 مرطب الجسم بالصبار - جل مهدئ

ريحته احسها زي الخيار بالسكر اظن 🌚

جميله وخفيفه مره وترطيبه جميييييل وتحسيه زي المويا ويبرد ع الجسم وينشف بسرعه ويخلي جسمك ناعم 

بس اذا بشرتك مررره جافه بالذات في الشتاء ماتقدري تستعمليه لوحده كمرطب لانو ترطيبه خفيف جدا

بس ممتاز واحب اخلطه مع زيوت للجسم احس يعطيني نتيجه افضل 

 مكتوب انو يناسب كل انواع البشره وتقدري تستعمليه كمان لوجهك وشعرك بس ماجربت 😆

وان شاءالله حرجع اشتري منهم الكريم للجسم شكله يحمس 

💚🍁

Physician's Formula, Inc., Butter Bronzer, Light Bronzer, 0.38 oz (11 g)

هذا البرونزر من فيزيشين فورميلا جمييييييل

لونه مررره حلوو ماتحسيه مره اورنج ولا باهت تحسي كذا جميل جمييل

وخفييف وزي الزبده منجد لمن احطه يخلي شكل بشرتي صحي ومايبين كاني حاطه بودره لا مره لطيف شكله

احس يناسب البشره الفاتحه والحنطيه اكثر  

🤓❤️

Now Foods, Solutions, Vegetable Glycerine, 16 fl oz (473 ml)

زيت الجلسرين النباتي
مكتوب انو ١٠٠٪ نقي ،، يرطب وينعم الجسم ويناسب كل انواع البشره ومايتأكسد بسرعه يعني العلبه الكبيره تجلس عندك فتره وانتي مرتاحه ☺️

 انا استخدمه لكل جسمي غير وجهي مره جميل وترطيبه ممتاز ولطيف مره ع البشره ومن فوائده انو ينعم البشره مره
ويزيل اثار الحبوب ومحارب للتجاعيد ، قريت كمان انو يستخدم كثير في واقيات الشمس وانواع مختلفه من كريمات البشره
حبيت انو مو ثقيل ع البشره ويضايق وفي نفس الوقت مفعوله ممتاز وترطيبه ١٠٠٪ كويس
احب نعومة بشرتي بعد ماستعمله لمن جلدي يمتصه ومايبقى منو اثر احس بنعووومه تجيب السعاااده

Now Foods, Solutions, Shea Butter, 7 fl oz (207 ml)

زبدة الشيا
اتوقع ماحد في العالم ماجربها وحبها هذا المنتج العظيم بكل انواعه
اول مره اجرب هذا النوع بس ماخيب ظني ممتاز جدا وترطيبه عالي وثقييل مره
احب استخدمه للأرجل والركب والاكواع ويدي مرررره ممتااااز ولو فيا نقطة جفاف تختفي في ثواني
بيرفكشن يخي مره، بس مشكلته انو ثقيل لازم تذوبيه وانا صراحه ذوبت كميه بسيطه منو وحطيتها في علبه لوحده
ممكن تستعمليه لاي مكان تحبيه وفوائده كثيره منها يخلص الجسم من التصبغات ، اثار الحبوب، يساعد على انتاج
الكولاجين ، وممكن تخلطيه مع مكونات ثانيه وتستخدميه لشعرك
متعدد الاستخدامات وفوائده كثيره
😻🤓

Sundown Naturals, Vitamin E Oil, 70,000 IU, 2.5 fl oz (75 ml)

زيت فيتامين E
هذا المنتج كمان ماتوقع احد ماجربه سواء زيت ، كريم او حبوب
مكتوب انو نقي، ومافي زيوت غير عضويه او معدنيه
يخفف من الخطوط الخفيفه في البشره وترطيبه عالي
:من فوائده
  يفتح البقع البنيه في الجسم زي اثار الحبوب او الحروق الخفيفه او البقع اللي تجي مع تقدم العمر
يعالج حروق الشمس
يفتح المناطق الغامقه في البشره
يعالج مشاكل الجفاف وترطيبه عالي جدا
يعالج مشاكل التمدد في البشره
وغيرها فوائد كثيره للشعر والشفايف احبه مررره وماستغني عنه ابداااا

طريقتي في الترطيب: استخدم هذي الثلاثه المنتجات مع جل الصبار سوا
اول شي اذوب زبدة الشيا في الميكرويف وبعد ماخرجها احط عليها كميه بسيطه من زيت الجلسرين وزيت فيتامين اي واخلطهم سوا كويس وبعدين اضيف عليهم جل الصبار واحط الخليط في علبه واستخدمه مره ممتااااز مره مره مره
😻❤️❤️

Nutiva, Organic Chia Seed, Black, 12 oz (340 g)

بذور الشيا
هذا النوع عضوي ونباتي وكثيير كثير يمدحوه وانا اخذته على المدح اللي سمعته
استخداماتها متعددة، تقدري تحطيه مع المشروبات والاكل
مثلا انا جربته مع الحليب طعمها مره يمي بالعاده ماحب الحليب بس عجبتني الشيا معاه حطيت ملعقتين كبيره وبعدين لاحظت شكلها يبدا يتغير وتسير كذا كانو عليها فقاعه 😀 بس هذا سر لزازتها 😌
جربتها مع الشوفان كمان ومع سلطه وبرضو يمي مره بس اكثر شي حبيتها مع السلطه
 ممكن كمان تضيفيها مع توست وجبنه او لبنه او مع زبادي او مع سموذي، اضافتها للطعام مره سهله وفوايدها جباره
🙌🏼❤️
من الوصفات الشائعه لها
تلاقو وصفات كثيره لها في بنترست chia pudding

معلومات عامه عنها: ١- مصدر جيد لأوميقا ٣ 

٢- غنيه بالبروتين
 ٣- تقدري تطبخيها او تضيفها على الاكل من غير طبخ بس لازم تكون مع اضافه للأكل او تنقعيها شويا قبل ماتاكليها

من فوائدها: ١- ممتازه للبشره ولمشاكل التقدم في العمر
٢- مفيدة جدا للجهاز الهضمي
٣- تساعد في معالجه مرض السكري
٤- تزيد الطاقه
٥- تقوي العظام لانو فيها كالسيوم
٦- تساعد في بناء عضلات الجسم وخسارة الوزن الزائد
٧- تساعد في محاربة سرطان الثدي وعنق الرحم
٨- ممتازه للصحه العامه للاسنان لانو فيها كالسيوم وفيتامين أ وزنك

مصدر المعلومات
  هنا و هنا

Now Foods, Real Food, Organic, Whole, Raw Cashews, Unsalted, 10 oz (284 g)

https://sa.iherb.com/pr/Now-Foods-Raw-Pecans-Unsalted-12-oz-340-g/15162


هذا الكاشو والجوز الامريكي اخذت منهم مجموعه واخترتها خام غير مملحه طبيعيه ميه بالميه
طبعا غنيه عن التعريف انا احب اضيفها للسلطات
😋💚

Y.S. Eco Bee Farms, Raw Honey, U.S. Grade A, 22.0 oz (623 g)

اخذت هذا العسل الخام لونه مره عجبني ولفتي الطعم مره ممتاااز وماحسه مره حالي زي الانواع الثانيه 

ان شاءالله حرجع اشتريه اول ماتخلص الكميه اللي عندي

فوائد العسل كثير وغنيه عن التعريف بس كل ماكان العسل عضوي وخام وماعليه اضافات كثيره كل ماكان افضل

🙏🏼🙌🏼

Chocolove, Almonds & Sea Salt in Dark Chocolate, 3.2 oz (90 g)

هذي الشوكلاتا اللذيذه جدااا جداااا اخذت بس ٣ حبات نجربها ومررره عجبتنا مررره

 اخذت الدارك شوكليت منها وفيها ملح البحر مره حبييت طعم الملح فيها طبعا شي لايذكر بس كذا

تحسي بطعم لمحة ملح مره ييمممميييي وفيها طبعا لوز 

مره احب الشوكلاتا فقررت انتبه لانواع الشكولاتا اللي احطها في جسمي 

زي مانعرف انو الشوكليت كويسه عموما للصحه من غير مايكون عليها اضافات سيئه زي السكر والزيوت 

هذي مافيها زيوت كمان ف مره ممتاز 

😌❤️

وبس خلصت الحمدلله اول بوست طويل اكتبه ومره اخذت وقت فيه

ان شاءالله يكون طلعتو بفايده واستمتعوا 

شكرا جزيلاً لقرائتك 

❤️❤️

13